محمد أحمد.. قصة نجاح في عالم الديكور والعمارة
مواصلةً لمبادرة تسليط الضوء على قصص النجاح الملهمة، نسلط اليوم الضوء على تجربة مميزة من قلب الصعيد، وتحديدًا من محافظة قنا، حيث استطاع الشاب الطموح محمد أحمد أن يصنع لنفسه اسماً لامعاً في مجال الديكور والتصميم الداخلي، ويؤسس “توب ديكور”، الذي يُعد اليوم أكبر ستور ديكورات في قنا.
بدأت رحلة محمد في عام 2010، بدافع الشغف وحب التميز في كل ما يتعلق بعالم التشطيبات والديكور. لم ينتظر كثيرًا بعد دراسته، بل اختار النزول إلى سوق العمل مبكرًا، وبدأ يكوّن خبراته بالتعامل المباشر مع الشركات والورش والمواقع، الأمر الذي أكسبه خبرة عملية واسعة منذ سن صغيرة.
محمد: “كنت عايز أشتغل بطريقتي ومخفتش أجرب”
منذ البداية، قرر محمد أن يسلك طريق العمل الحر بدلًا من الوظائف الروتينية. يقول:
“كنت حابب أشتغل بطريقتي ومخفتش أجرب، بالعكس كنت طول الوقت بدوّر على التطور والمغامرة وتجربة كل جديد ومميز في السوق.”
هذا الإصرار على التميز والاعتماد على النفس كان الدافع الحقيقي وراء تأسيسه لـ”توب ديكور”، المشروع اللي بدأ صغير، لكنه كبر بخطوات واثقة.
محمد: “نزولي المواقع وفّرق معايا كتير”
بعكس المعتاد من أصحاب المكاتب، كان محمد حريص دايمًا على التواجد بنفسه في مواقع التنفيذ. بيقول:
“من أول يوم وأنا بنزل المواقع وبقف على كل تفصيلة، وده فرق معايا جدًا وزود خبرتي من كل الاتجاهات، سواء في التعامل مع الصنايعية أو في حلول المشاكل على الأرض.”
بيت العميل = بيت محمد
من الحاجات اللي بتميز محمد في شغله، إنه بيتعامل مع كل وحدة أو شقة كأنها بيته. بيحكي:
“أي شغل بدخله بشتغل فيه بكل قلبي كأنه بيتي، وده بيبان في التفاصيل وفي رد فعل الناس بعد التسليم.”
الاهتمام بالتفاصيل الصغيرة والإخلاص في كل خطوة ساعدوا محمد يبني سُمعة طيبة في مجاله، ويكسب ثقة عملاء كتير.
خامات عالية.. وأسعار مناسبة
واحدة من أهم مميزات “توب ديكور” هي إن محمد بيعتمد على مصادره الخاصة في توفير الخامات، وده بيساعده يقدم أعلى جودة بأقل تكلفة ممكنة:
“مش منطقي العميل يدفع زيادة في بند مش محتاج أكتر من كده، الصح إننا نوفر في البنود الفرعية ونستثمر أكتر في الحاجات الأساسية زي الدهانات والتشطيبات اللي بتعيش.”
صنايعية متجربين.. وشغل مضمون
محمد ما بيشتغلش مع أي صنايعي إلا لما يجربه الأول في شغل يخصه شخصيًا:
“لازم أكون جربت الشغل بعيني، وده بيضمنلي إن الفريق اللي معايا يطلع الشغل بنفس المستوى اللي أنا عايزه، والحمد لله الصنايعية اللي معايا دلوقتي على أعلى مستوى.”
الأمانة قبل أي شيء
بيعتبر محمد إن الأمانة هي خط الدفاع الأول في مجاله:
“أكتر حاجة لازم نتمسك بيها هي الأمانة، لأن للأسف فيه فرص كتير للسهل السريع، لكن الصح مش دايمًا سهل، ودي كانت نصيحة من مهندس كبير في أول طريقي، وفهمت معناها بعد ما نزلت السوق.”
محمد بيشتغل بنفسه في كل تفصيلة
رغم كبر المشروع، مازال محمد بيحب يتابع كل شيء بنفسه:
“أنا بنزل أشتري الخامات بنفسي، وأتابع تنفيذ كل شغل خطوة بخطوة، وبالذات لو العميل ساكن في البيت أثناء التنفيذ، بيبقى عندي حرص أكتر ننجز بسرعة وبجودة.”
“توب ديكور”.. أكبر ستور ديكورات في قنا
من خلال “توب ديكور”، قدر محمد يقدم تجربة متكاملة تشمل تصميم وتنفيذ، تشطيبات، اختيار خامات، وتركيب كل مكونات الديكور الداخلي، وكل ده تحت إشرافه الكامل وفريق محترف مدرَّب.
وبيتميز المكان بتوفير خامات مستوردة ومحلية بجودة عالية وسعر منافس، وده خلاه الخيار الأول لأغلب أهالي قنا اللي بيدوروا على الذوق العالي والالتزام والجودة.
محمد: “نفسي كل بيت أشتغل فيه يدعيلي طول العمر”
بيختم محمد كلامه بجملة دايمًا بيكررها لكل فريقه:
“أنا هدفي لما أخلص شغل في بيت، أهله يفضلوا فاكريني بالخير ويدعولي طول العمر.. ده النجاح الحقيقي.”
ومع استمرار التوسع والطلب المتزايد على خدمات “توب ديكور”، بيأمل محمد في تقديم مستوى أعلى من التصميمات العصرية، وتوسيع نطاق خدماته قريبًا خارج حدود الصعيد ومحافظة قنا .
